قصيدة الميدان لعبدالرحمن الابنودي

ايادي مصرية سمرا ليها في التمييز
ممدودة وسط الزئير بتكسر البراويز
سطوع
لصوت الجموع
شوف مصر تحت الشمس
آن الآوان ترحلي يا دولة العواجيز
عواجيز شداد مسعورين اكلوا بلدنا اكل
ويشبهوا بعضهم نَهَم
وخسة وشكل
طلع الشباب البديع قلبوا خريفها ربيع
وحققوا المعجزة
صحوا القتيل من القتل
اقتلني قتلي ما هيعيد دولتك تاني
بكتب بدمي حياة تانية لأوطاني
دمي دة ولا الربيع!!؟
الاتنين بلون اخضر
وببتسم من سعادتي ولا احزاني ؟!
....
تحاولوا
ما تحاولوا
ما تشوفوا وطن غيره
سلبتوا دم الوطن وبشيمته من خيره
احلامنا !!
بكرانا !!
ااصغر ضحكة علي شفة
شفتوش الصياد يا خلق بيقتلوا طيره ....
السوس بينخر وسارح تحت اشرافك
فرحان بيهم كنت
وشايلهم علي كتافك
واما اهالينا من زرعوا وبنوا وصنعوا
كانوا مداس ليك ولولادك واحلافك
ويا مصر
يا مصر
آن العليل رجعتله انفاسه
وباس جبين الوطن , مال الوطن باسه
من قبل موته بيوم صحوه اولاده
ان كان سبب علته محبته لناسه
...
الثورة فيضان قديم
محبوس
مشافوش زول
الثورة لو جد متبانش في كلام او قول
تقلب وتعدل في سرية تفور في القلب
وتنغزل فتلة فتلة في ضمير النول
...
متخافش علي مصر يابا
مصر محروسة
حتي من التهمة دي اللي فينا مدسوسة
ولو انت ابوها بصحيح وخايف عليها اوي !!
تركتها ليه بدن بتنخره السوسة
وبيسرقوك يا الوطن قدامنا عيني عينك
ينده بقوة الوطن
ويقوللي قوم
فينك؟؟
ضحكت علينا الكتب بعدت بينا عنك
لولا ولادنا اللي قاموا يسددوا دينك
....
لكن خلاص يا وطن
صحيت جموع الخلق
قبضوا علي الشمس بايديهم
وقالوا لأ!!
من المستحيل يفرطوا عقد الوطن تاني
و الكدب تاني محال يلبس قناع الحق
بكل حب الحياة خوٍط في دم اخوك
قول انت مين للي باعوا حلمنا وباعوك
واهانوك
وذلوك
ولعبوا قمار باحلامك
نيران هتافك تحرر صاحبك الممسوك
.....
يرجعلها صوتها مصر
تعود ملامحها
تاخد مكانها القديم
والكون يصالحها
عشرات سنين تسكنوا بالكدب في عروقنا
والدنيا متقدمة ومصر مطرحها
.....
كتبتوا اول سطور في صفحة ثورة
وهما عُلَما و خُبَرَة مداورة ومناورة
وقعتوا فرعون هرب من قلب تمثاله
لكن جيوشه مازالوا يحلموا ببكرة
صباح حقيقي ودرس جديد اوي في الرفض
اتاري للشمس صوت واتاري للارض نبض
تاني معاكم رجعنا نحب كلمة مصر
تاني معاكم رجعنا نحب ضحكة بعض
.....
مين كان يقول ابننا يطلع بنا من النفق
دي صرخة ولا غنا
وده دم ولا شفق
اتاريها حاجة بسيطة الثورة يا اخوانا !!
مين اللي شافها كدة مين اول اللي بدأ
مش دول شاببنا اللي قالوا كرهوا اوطانهم
ولبسنا توب الحداد وبعدنا اوي عنهم !!؟
هما اللي قاموا النهاردة يشعلوا الثورة
ويصنفوا الخلق مين عانهم ومين خانهم
....
يادي الميدان اللي حضن الذكري وسهرها
يادي الميدان اللي فتن الخلق وسحرها
يادي الميدان اللي غاب اسمه كتير عنه وصبرها
ما بين عباد عاشقة و عباد كارهة
شباب كأن الميدان اهله وعنوانه
ولا في الميدان نسكافيه ولا كابتشينو
خدوده عرفوا جمال النوم عالأسفلت
والموت عارفهم اوي
وهما عارفينه
لا الظلم هين يا ناس ولا الشباب قاصر
مهما حاصرتوا الميدان عمره ما يتحاصر
فكرتني يا الميدان بزمان وسحر زمان
فكرتني بأغلي ايام
في زمن ناصر
....
شايل حياتك علي كفك
صغير السن
ليل بعد يوم المعاناة
وانت مش بتأن
جمل المحامل وانت غض
بتعجب امتي عرفت النضال
اسمحلي حاجة تجن!!!!
اتاريك جميل يا وطن مازلت و هتبقي
زال الضباب وانفجرت باعلي صوت
لأه !!
حركتنا نبتسم ودفعت انت الحساب
وبنبتسم بس بسمة طالعة بمشقة
.....
فينك يا صبح الكرامة لما البشر هانوا
وأهل مصر الأصيلة اتخانوا واتهانوا
بنشتري العزة تاني والتمن غالي
فتح الوطن للجميع قلبوا و احضانو
الثورة فيض الأمل وغنوة الثوار
الليل اذا خانه لونه يتقلب لنهار
ضج الضجيج بالندا اصحي يا فجر الناس
فينك يا صوت الغلابة وضحكة الانفار؟؟!
.....
وأحنا وراهم أساتذة خايبة
تتعلم
ازاي نحب الوطن وامتي نتكلم ؟؟!!
لما طال الصدي قلبنا ويأسنا من فتحه
قلب الوطن قبلكم كان خاوي ومضلم
....
أولنا في الجوله
لسة الجولة
ورا جولة
دة سوس بينخر يا ابويا في جسد دولة
ايوة الملك صار كتابة انما أبدا
لو غفلت عينا لحظة هيقلبوا العملة
.....
لكن خوفي مازال جوة الفؤاد يكبش
اخوفي اللي ساكن شقوق القلب
ومعشش
يقوللي مش راح يسيبه ولسه هيإبوا
وهيلاقولهم سكك وببان ما تتردش
وحاسبوا اوي من الديابة اللي في وسطيكم
حاسبوا اوي من الديابة اللي في وسطيكم
والا تبقي الخيانة منك وفيكم
الضحك علي البق بس الرك عالنيات
فيهم عدوين اشد من اللي حواليكم