اسئله عاديه وبسيطه بس (بطريقتى)

ليه برامج الأطفال بتيجى الساعه عشره الصبح ؟
مع ان كل الاطفال بتبقى ساعتها فى المدرسه

ليه سيادة الريس راح المانيا يعمل عملية مراره تافهه؟
مع انه قال ان مستشفياتنا افضل مستشفيات فى الشرق الاوسط

ليه لما الراجل بيروح بيتهم مراته تقوله انت جيت ؟
مع انه واقف قدامها

ليه لما يكون فى انشاء طريق وخط ميه او غاز ؟
بنعمل الطريق الاول ونرجع نهده ونعمل خط الميه ونرجع نعمل الطريق من جديد وهكذا

ليه فى كفر الشيخ جزيرة الورد اللى بتبقى على الرصيف بتتكلف 60 الف ؟
مع ان نادى جزيرة الورد عندنا كله متكلفش كام مليون

ليه بنصدر الغاز الطبيعى والكهربا لاسرائيل والحديد لبناء الجدار العازل ؟
مع اننا كلنا بنقول اننا مش معترفين باسرائيل

ليه بنفرض الضريبه العقاريه ؟
مع ان اقتصادنا بعد الابحاث اللى اتعملت عليه اتقال عليه جمله هقولهالكم فى سنة 97
(عجبا للاقتصاد المصرى برغم كل ما يتعرض اليه من سرقه ونهب الا انه مازل واقفا على قدميه ووسيظل هكذا)

ليه المرشح لرئاسة الجمهوريه لازم ياخد 250 صوت من مجلس الشعب علشان يتقبل تترشيحه ؟
مع انا مفيش حد هيجيب الاصوات دى غير واحد حزب وطنى
طبعا انتم عارفينه

ليه بعض الدكاتره فى كليتنا بيتكبروا على طلبة الجنرال ؟
مع انهم بيعاملوا طلبة الاسبيشيال معامله فوق الوصف

ليه لما ولد يروح يقول لبنت انه بيحبها تقولوا انا موافقه او مش موافقه ؟
مع انو بكلامه كده مطلبش منها حاجه

ليه البنات كلهم بقو استايل واحد ؟
مع ان لسه فى حاجات كتيره ممكن تخلى البنت مميزه

ليه لما واحد يييجى داخل فى مشروع يبص لصاحبه اللى خسر ويقول بلاش ؟
مع انو لو بص للى كسب ممكن يتعلم منو ويكسب زيو

ليه لما حد من الاقاليم ييجى رايح القاهره يقول انا نازل مصر ؟
مع ان مصر 28 محافظه
الكلمه دى بتبين معاناة 60 مليون مصرى فى الاقاليم لان كل حاجه موجوده فى القاهره فبقت القاهره بالنسبالهم هى مصر خساره
ليه كلنا يا جماعه بقينا بنفكر بطريقه سلبيه
كل واحد بيفكر بدماغ اهله والتنسيق والحكومه والواقع والمفروض
طب انت فين ؟
فين شخصيتك وحياتك ودماغك
سورى انى قلبت المواجع بس انا قلبت المواجع دى لانى عشتها
ومحبش حد يعيشها
والجايات كتير واكيد هنكمل كلامنا بعدين
سلام

زائر

تسلم على مجهوداتك وبرجاء الاحساس بشعور اللى بيخشو على المنتدى

اشطه على المواضيع الجامده يا عم نينو ونتقابل قريب